Sa Iyo

Kapag naubos ang mga pahina ng libro ng aking buhay
ang bawat pagbabalik tanaw ay tila mga bubog
na gumagasgas sa aking natutuyong pagkatao.

Tuwing ililipat ang paningin,
maghihingalo sa pagsikat ng aking nakaraan.
Maririnig ang sigaw ng pagtangis
na kailanman at di pa naririnig mg aking mundo.

Ang mga tinta ay mga luhang
dumaloy upang tapusin ang mga salita
ng isang dilang dumudugo sa kawalan.
Ang bawat letra ay ang pagkalagas
ng mga buhok na naghihintay ng walang hanggan.

Maabo ang bawat pahina at manunuot
sa aking paimbabaw na katatagan.
Lulusawin ang makapal na yelo ng pagpapanggap
at ang apoy ay maglalagablab sa isang pusong nanaghoy.
Tahimik na humihikbi ang pagbabalik-tanaw,
ngunit isang lihim na digmaan ang pumapaimbulong

At umaasang
maisisiwalat.
Kung ito'y matatapos mararating ko
ang ngiting kay tagal
na inasam at kay tagal
na iyo'y
ipinagkait.